Rade Šerbedžija: Imam nelagodnosti u gradu u kojem živim i radim

Glumac Rade Šerbedžija, čiju zabranu nastupa u Zagrebu ovih dana traže hrvatski veterani, umalo nije napustio studio regionalne N1 TV u Beogradu, nakon što je iz zagrebačkog studija te televizije konstatovano da se to možda ne bi dogodilo da imaju priliku da čuju njegov odgovor na pitanje ko je u proteklom ratu bio agresor, a ko žrtva, prenosi Tanjug.

"Hoćete li vi mene ostaviti na miru, čovječe, ne želim o tom stvarima da govorim! Da se sad dignem iz studija? Rekao sam već – to nije istina što su citirali žutu štampu, ja takve stvari nijesam rekao! Ja zato imam nelagodnosti u zemlji u kojoj živim i gradu u kojem radim, ne želim da budem tako obilježen i lažno napadan. Imate li neko drugo pitanje", zapitao je Šerbedžija.

Prethodno Šerbedžija je upitan da pojasni svoju izjavu da “treba biti svjestan, da sve to što se radilo u ime srpstva, hrvatstva, muslimanstva i ostalih ‘izama’ i nacionalizama, sve su činili pojedinci, jedan mali dio ljudi”.

Zašto našim odnosima i danas u najvećoj mjeri dominiraju teme iz te toliko ružne prošlosti, glasilo je pitanje.

"Ja sam toliko ranjen raznim stvarima, ne samo ovim posljednjim, nego zbog mnogih stvari koje sam govorio ovim narodima, a to je uvijek bilo protiv rata. Bez obzira na političke i nacionalne razlike ljudi. Zato ne želim o tome više da pričam", rekao je Šerbedžija.

Proslavljeni glumac, koji živi u Hrvatskoj, po ocu je Srbin. Njegov otac živi u Beogradu i ima 104 godina.

Izvor: CdM