Zaev najavio impičment Ivanova, -ako mora-

Parlamentarna većina će tražiti impičment predsjednika Makedonije Đorđa Ivanova, ako ne potpiše dogovor sa Grčkom, a građani na referendumu se izjasne pozitivno.

To je izjavio premijer Makedonije Zoran Zaev.

"Ima želja za ukrupnjavanje parlamentarne većine i to ćemo napraviti isključivo za impičmnet predsjednika, ako moramo. Završilo se vrijeme prenemaganja, laganja, ličnih kalkulacija i političkog kalkulanstva. Makedonija mora da krene naprijed", rekao je Zaev za TV "Kanal 5". 

Makedonski premijer je istakao da su građani ti koji će odlučiti da li žele promjenu imena države, ali da ako dogovor sa Grčkom bude prihvaćen na referendumu, niko nema pravo da spriječava njihovo mišljenje. 

"Mi smo tu da slušamo i sprovodimo. Građani će donijeti odluku koju moramo svi da poštujemo. Ne prijetim, ja sam mnogo realan i častan čovek, ali ću uraditi sve da spriječim eventualnu blokadu prava građana da se izjasne", rekao je premijer Makedonije Zoran Zaev u emisiji "Samo istina".

Izvor: Beta